நைஜர் ஆறு

நைஜர் ஆறு (Joliba, Isa Ber, Oya, gher n gheren)
River
மாலியின் கூலிகோரோ என்னுமிடத்தில் நைஜர் ஆற்றின் தோறம்.
பெயர் மூலம்: தெரியாது. ஆற்றைக் குறிக்கும் பேபர் மொழிச் சொல்லான கேர் என்பதிலிருந்து வந்திருக்கக் கூடும்.
நாடுகள்	கினியா,  மாலி,  நைஜர்,  பெனின்,  நைஜீரியா
கிளையாறுகள்
- இடம்	சொக்கோட்டோ ஆறு, கடுனா ஆறு, பெனூ ஆறு
- வலம்	பானி ஆறு
நகரங்கள்	தெம்பகூண்டா, பமாக்கோ, திம்புக்டு, நியாமே, லோகோஜா, ஒனிட்ஷா
நீளம்	4,180 கிமீ (2,597 மைல்)
வடிநிலம்	21,17,700 கிமீ² (8,17,649 ச.மைல்)
நைஜர் ஆற்றைக் காட்டும் நிலப்படம், நைஜர் வடிநிலம் பச்சை நிறத்தில் காட்டப்பட்டுள்ளது

நைஜர் ஆறு மேற்கு ஆபிரிக்காவின் முக்கியமான ஆறு. 4180 கிமீ (2600 மைல்) நீளம் கொண்ட இந்த ஆற்றின் வடிநிலம் 2,117,700 சதுர கிலோமீட்டர்கள் (817,600 சதுர மைல்) பரப்பளவு கொண்டது. தென்கிழக்கு கினியாவில் உள்ள கினியா உயர் நிலப் பகுதியில் தொடங்கி, மாலி, நைகர், பெனின் எல்லை, நைஜீரியா போன்ற நாடுகளூடாகப் பாய்ந்து மிகப் பெரிய நைஜர் கழிமுகத்தின் ஊடாக கினியாக் குடாவுக்குள் கலக்கிறது. ஆபிரிக்காவில் ஓடும் ஆறுகளில், நைல், காங்கோ ஆறு ஆகியவற்றுக்கு அடுத்தபடியாக மூன்றாவது பெரிய ஆறு நைஜர் ஆறு.

புவியியல்

நைஜர் ஆறு ஒப்பீட்டளவில் தெளிவான ஆறு. இது நைல் நதி கொண்டு செல்லும் அளவில் பத்தில் ஒரு பங்கு படிவுகளையே கொண்டு செல்கிறது. இதன் நிலக்கூம்புப் (headland) பகுதி தொன்மைப் பாறைகளில் அமைந்திருப்பதால், குறைந்த அளவு வண்டலே ஆற்றில் கலக்கிறது. நைல் ஆற்றைப் போலவே நைஜரிலும் ஆண்டுக்கு ஒரு முறை பெருக்கு ஏற்படுகின்றது. இது செப்டெம்பரில் தொடங்கி நவம்பர் மாதமளவில் உயர்நிலை அடைந்து மேயில் முடிவடைகிறது.

திடீரென இது ஓடும் பாதையில் நிலத்தின் சரிவு குறைவடைவதால், வழமைக்கு மாறான ஒரு அம்சமாக உள்நாட்டுக் கழிமுகம் ஒன்றும் உருவாகியுள்ளது. இதனால் இவ்விடத்தில் வலைப் பின்னலாக அமைந்துள்ள சிற்றாறுகளும், சதுப்பு நிலங்களும், ஏரிகளும் பெல்ஜியம் நாட்டின் பரப்பளவுக்குச் சமனான நிலப்பகுதியில் பரந்து அமைந்துள்ளன. பருவகால ஆற்றுப் பெருக்கு வேளாண்மை, மீன்பிடித் தொழில் ஆகியவை தொடர்பில் மிகுந்த உற்பத்தித்திறன் கொண்டதாக அமைகின்றது.