காரி கிழார்
காரி கிழார் சங்ககாலப் புலவர்களில் ஒருவர். அவரது ஒரே ஒரு பாடல் புறநானூறு 6 [1] எண் கொண்ட பாடலாக உள்ளது.
காரி என்னும் சொல் நஞ்சைக் குறிக்கும். அது ஆகுபெயராய் நஞ்சுண்ட சிவபெருமானையும் குறிக்கும். இவரது பெயர் சிவபெருமானை அழைக்கும் பெயர்.
பாடலில் இவர் சொல்லும் கருத்துகள் புராண நம்பிக்கையின் அடிப்படையில் அமைந்துள்ளன.
பாடல் சொல்லும் செய்திகள்[தொகு]
பாண்டியன் பல்யாகசாலை முதுகுடுமிப் பெருவழுதி[தொகு]
'தண்டா ஈகைத் தகைமாண் வழுதி' என இவன் போற்றப்படுவதால் இவன் சிறந்த கொடைவள்ளல்களில் ஒருவன் எனத் தெரியவருகிறது.
வாழ்த்தியல்[தொகு]
தண்கதிர் மதியம் போல மற்றவர்களுக்குக் குளுமையாகவும், ஞாயிற்றின் ஒளியைப்போல மற்றவர்களுக்கு விளக்கமாவும் வாழ்வாயாக எனப் புலவர் வழுதியை வாழ்த்துகிறார்.
செவியறிவுறூஉ[தொகு]
காதுகளில் தைக்கும்படி அறிவுறுத்துவது செவியறிவுறூஉ. புலவர் அரசன் காதுகளில் உறைக்கும்படி சில செய்திகளை இப்பாடலில் கூறுகிறார்.
- பகை வென்று கொண்டுவந்த நன்கலங்களை பரிசில் பெற வருவொர்க்குச் சீர்வரிசைகளாக நல்குக.
- முனிவர் முக்கண் செல்வர் (சிவபெருமான்) திருமேனி நகர்வலம் வரும்போது உன் வெண்கொற்றக் குடை பணியட்டும்.
- நான்மறை முனிவர் கையேந்தும்போது உன் தலை வணங்கட்டும்.
- பகை நாட்டை அழித்துத் தீயிட்டுக் கொளுத்தும் புகையில் உன் பூ மாலை வாடட்டும்.
- மங்கையர் ஊடல் நீண்டு துனியாக மாறும் காலத்தில் உன் வெகுளி தணியட்டும்.
பொருண்மொழிக் காஞ்சி[தொகு]
நன்னெறியைப் பொருண்மொழி என்பது சங்ககால வழக்கு. செவியறிவுறூஉ பகுதியில் புலவர் அரசர்க்கு நன்னெறிகளாகக் கூறும் செய்திகளைப் பொருண்மொழிக் காஞ்சி என்றும் கொள்கின்றனர்.
புராணச் செய்தி[தொகு]
- 'கீழது முப்புணர் அடுக்கிய முறைமுதல் கட்டின் நீர்நிலை நிவப்பு'
உலகின் கட்டு 3 நிலைகளாக அடுக்கப்பட்டுள்ளது. அந்த அடுக்கின் இடைநில் உள்ளது நாம் வாழும் உலகம். கீழே உள்ளது நீர்நிலை ஓங்கியுள்ள உலகம்.
- 'மேலது ஆனிலை உலகம்'
மேலே உள்ளது ஆன்மாக்கள் வாழும் உலகம்.
இங்கெல்லாம் முதுகுடுமிப் பெருவழுதியின் புகழ் பரவ வேண்டும் என்று இப்புலவர் வாழ்த்துகிறார்.
பழந்தமிழ்[தொகு]
- ஞமன்ன் = எமன்
- தொடுகடல் = வங்கக் கடலின் பழங்காலத் தமிழ்ப் பெயர்
- பற்றலியரோ = பற்றுக