ஐந்திரம் (இலக்கண நூல்)

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்

ஐந்திரம் என்பது சமற்கிருத இலக்கணநூல். இந்த நூல் பற்றிய மேற்கோள் குறிப்புகள் மட்டும் சமற்கிருத நூல்களில் உள்ளன. தமிழில் அகத்தியம் பற்றிய குறிப்புகள் தமிழ்நூல்களில் உள்ளது போன்றவை அவை.

ஐந்திரம் என்னும் நூல் இந்திரனால் செய்யப்பட்டது என்பர். தமிழ் இலக்கண நூலாகத் தொல்காப்பியம் கிடைத்துள்ளது போல வடமொழி இலக்கண நூலாக இப்போது கிடைத்துள்ள நூல் பாணினியம்.

பாணினியத்துக்கு முந்துநூலாகக் கண்டறியப்பட்டுள்ள வடமொழி இலக்கண நூல்கள் 13. அவற்றில் ஐந்திரம் [1] என்பதும் ஒன்று. ஐந்திரம் பற்றிய குறிப்புகள் வடமொழி நூல்களில் காணப்படுபவை அந்நூலுக்கான அகச்சான்றுகள். அந்நூலுக்குப் புறச்சான்றாக உள்ளது தொல்காப்பிய நூலுக்குத் தரப்பட்டுள்ள பனம்பாரனாரின் பாயிரம் ஆகும். இதில் 'ஐந்திரம் நிரைந்த தொல்காப்பியன்'[2] என்று பனம்பாரனார் குறிப்பிட்டுள்ளார்.

ஐந்திரம் பற்றிய பர்னல் ஆய்வு தொல்காப்பியம் பாணினியின் காலத்துக்கு முந்தியது என்பதைக் காட்டுகிறது.

பாணினியின் காலம் கி.மு. எட்டாம் நூற்றாண்டு என்று கணிக்கப்பட்டாலும், கி.மு. நான்காம் நூற்றாண்டு என்று பலரும் கூறிவருகின்றனர். இந்தப் பாணினிக்கு முந்துநூலாக இருந்த 13 நூல்களில் முதலாவதாகக் கருதப்படும் ஐந்திரம் மிகப் பழமையானது என்பது தெளிவு. தொல்காப்பியர் காலத்தில் பாணினியம் இல்லை. ஐந்திரம் என்னும் நூல்தான் இருந்தது. பனம்பாரனாரின் பாயிரத்தில் உள்ளபடி தொல்காப்பியர் 'முந்துநூல்' கண்டவர். அதாவது அகத்தியத்தில் ஆழங்கால் பட்டவர். அத்துடன் ஐந்திர இலக்கண அறிவும் நிரம்பியவர். எனவே ஐந்திரம் என்னும் நூலும், தொல்காப்பியமும் சற்றேறக் குறைய சமகாலத்தவை எனக் கொள்ளத் தக்கவை. (கி.மு. எட்டாம் நூற்றாண்டு)

மேற்கோள்கள்[தொகு]

  1. ஐந்திரம்
  2. மல்குநீர் வரைப்பின் ஐந்திர நிறைந்த
    தொல்காப் பியன்எனத் தன்பெயர் தோற்றி
    ::::::::: - தொல்காப்பியப்பாயிரம்
"http://ta.wikipedia.org/w/index.php?title=ஐந்திரம்_(இலக்கண_நூல்)&oldid=1465574" இருந்து மீள்விக்கப்பட்டது