இந்தியச் சரணாலயங்கள்

கட்டற்ற கலைக்களஞ்சியமான விக்கிப்பீடியாவில் இருந்து.

சரணாலயங்கள்(Sanctuary) என்பவை விலங்குகள், தாவரங்கள், நிலப்பரப்பு மற்றும் வரலாற்று முக்கியத்துவமுள்ள பொருட்கள் போன்றவற்றை பாதுகாக்க அமைக்கப்பட்டுள்ளவை ஆகும். வனத்துறை அலுவலர்களின் அனுமதியின்றி எந்தவொரு விலங்கையும் பிடிக்க, கொல்ல தடை செய்யப்பட்டுள்ள காட்டுப் பகுதி சரணாலயம் எனப்படும். இயற்கையின் பரிணாம வளர்ச்சி சீராக நடைபெற எந்தெந்த உயிரினம், எந்தெந்த இடத்தில் உள்ளதோ அந்தந்த இடத்தில் அவை இயல்பாக வாழ, வளர அனுமதிப்பவை சரணாலயங்கள் ஆகும்.[1]

இந்தியாவில் மட்டுமில்லை வெளிநாடுகளிலும் வனவிலங்குகளையும், பறவைகளையும் வேட்டையாடிக் கொன்று வீரம் என்று மகிழ்ச்சி அடைவதும், அதன் இறைச்சியை உண்பதும், இறைச்சியை மருத்துவப் பொருளாகப் பயன்படுத்துவதுமாக பல நோக்கங்கள் இருக்கின்றன. இந்த நோக்கங்களால் அரியவகை பல வனவிலங்குகளும், பறவைகளும் இன்று இல்லாமல் போய்விட்டன. இனியும் இந்த நிலை நீடிக்கக் கூடாது என்கிற எண்ணத்தில் இந்திய அரசும், மாநில அரசுகளும் 247 வனவிலங்கு சரணாலயங்கள், 55 தேசீயப் பூங்காக்களையும் உருவாக்கிப் பராமரித்து வருகின்றன. இவற்றில் முக்கியமான சில வனவிலங்குகள் மற்றும் பறவைகள் சரணாலயம் குறித்த சிறு தகவல்கள்; [2] [3]

தமிழ்நாடு[தொகு]

தமிழகத்தில், உயிரினங்கள் பாதுகாப்புக்கு எட்டு சரணாலயங்கள்; 13 பறவை சரணாலயங்கள்; ஐந்து தேசிய பூங்காக்கள்; மூன்று புலிகள் சரணாலயங்கள்; நான்கு யானை சரணாலயங்கள்; மூன்று பல்லுயிர் பெருக்கத் தளங்கள் உள்ளன. தமிழ்நாட்டில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்

கிண்டி[தொகு]

தமிழ்நாட்டின் தலைநகரான சென்னை மாநகரில் கிண்டி தேசீயப் பூங்கா உள்ளது. இந்தப் பூங்காவின் மொத்தப்பரப்பளவு 2.7 சதுர கிலோ மீட்டர்தான். இங்கு பலவகை மான்கள் இருக்கின்றன. இதனருகில் பாம்புப் பண்ணை ஒன்றும் அமைக்கப்பட்டுள்ளது.

களக்காடு-முண்டந்துறை புலிகள் சரணாலயம்[தொகு]

தமிழ்நாட்டில் திருநெல்வேலி மாவட்டத்தில் களக்காட்டுக்கு 15 கிலோ மீட்டர் தொலைவில் இருக்கும் திருக்குறுங்குடி மலைப்பகுதி தொடங்கி அம்பாசமுத்திரத்திலிருந்து 40 கிலோ மீட்டர் தொலைவில் இருக்கும் முண்டந்துறை மலைப்பகுதி வரையிலான வனப்பகுதி களக்காடு-முண்டந்துறை புலிகள் சரணாலயமாகும். இது புலிகளுக்கான சரணாலயம் என்றாலும் இம்மலைப் பகுதியில் மிளா, காட்டுப்பன்றி, சிங்கவால் குரங்கு, யானை, உடும்பு, கரடி, பலவகைப் பாம்புகளும் அதிகம் வாழ்கின்றன.

ஆனைமலை[தொகு]

தமிழ்நாட்டில் பொள்ளாச்சி அருகில் இருக்கும் ஆனைமலை வனப்பகுதியான இந்த சரணாலயத்தின் மொத்தப்பரப்பளவு 958 சதுர கிலோமீட்டர். இந்த சரணாலயத்தில் யானை, சிறுத்தை, புலி, காட்டு எருமை, கடம்பை மான், புள்ளி மான், காட்டுப்பன்றி, கரடி என்று நிறைய வன விலங்குகள் இருக்கின்றன.

முதுமலை[தொகு]

தமிழ்நாட்டில் நீலகிரி மாவட்டத்தில் இருக்கும் முதுமலை வனப்பகுதியான இந்த சரணாலயத்தின் மொத்தப்பரப்பளவு 321 சதுர கிலோமீட்டர். இந்த சரணாலயத்தில் யானை, சிறுத்தை, புலி, காட்டு எருமை, கடம்பை மான், புள்ளி மான், குரைக்கும் மான், காட்டுப்பன்றிகள், காட்டுப் பூனை, புனுகுப்பூனை, பறக்கும் அணில், பாம்பு வகைகள், பறவை வகைகள் என்று நிறைய காட்டுயிர்கள் இருக்கின்றன.

வேடந்தாங்கல்[தொகு]

தமிழ்நாட்டில் செங்கற்பட்டு ஊரில் இருந்து 28 கிலோ மீட்டர் தொலைவில் இருக்கும் வேடந்தாங்கல் சரணாலயத்தின் மொத்தப்பரப்பளவு 0.3 சதுர கிலோமீட்டர். இந்த சரணாலயத்தில் நவம்பர் மாதத்திலிருந்து பிப்ரவரி மாதம் வரை பல வெளிநாட்டுப் பறவைகள் வந்து இங்குள்ள நீர்நிலைகளில் தங்கி இருக்கின்றன.

கோடிக்கரை[தொகு]

தமிழ்நாட்டில் கோடிக்கரை ஊரிலிருக்கும் வனப்பகுதியில் 17 சதுர கிலோமீட்டர் பரப்பளவில் இந்த சரணாலயம் இருக்கிறது. இங்கு வெளிநாட்டுப் பறவைகள் ஏராளமாக வந்து தங்கிச் செல்கின்றன.

ஆந்திரா[தொகு]

ஆந்திராவில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்

நாகார்ஜீனசாகர் - ஸ்ரீசைலம்[தொகு]

ஆந்திராவின் குண்டூர், கர்நூல், நல்கொண்டா மற்றும் மகபூப் நகர் என்று ஐந்து மாவட்டங்களில் இருக்கும் மிகப்பெரிய நாகார்ஜீனசாகர் வனப்பகுதியான இந்த சரணாலயத்தின் மொத்தப்பரப்பளவு 3568 சதுர கிலோமீட்டராகும். இதில் நாகார்ஜீன சாகர் புலிகள் திட்டத்திற்கு மட்டும் 2800 சதுர கிலோமீட்டர் பரப்பளவில் இருக்கிறது. இந்த சரணாலயத்தில் புலி, சிறுத்தை, கரடி, காட்டுப்பன்றி, பலவகையான மான், நரி, ஓநாய் மற்றும் முதலை போன்றவைகள் நிறைய இருக்கின்றன.

கொல்லேரு[தொகு]

ஆந்திராவின் விஜயவாடா நகருக்கு அருகில் இருக்கும் கொல்லேரு சரணாலயம் ஏரியுடன் 673 சதுர கிலோமீட்டர் பரப்பளவுடையதாகும். இங்கு ஆண்டுதோறும் டிசம்பர் மாதம் முதல் மார்ச் மாதம் வரையுள்ள காலத்தில் நாரை, வண்ணக் கொக்கு மற்றும் நீர்நிலைப் பறவைகள் சில வந்து இனப்பெருக்கம் செய்து திரும்புகின்றன.

கர்நாடகா[தொகு]

கர்நாடகாவில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்

பந்திப்பூர்[தொகு]

கர்நாடகாவில் மைசூரில் இருந்து 65 கிலோமீட்டர் தொலைவில் இருக்கும் வனவிலங்குகளுக்கான இந்த தேசீயப் பூங்காவின் மொத்தப் பரப்பளவு 874 சதுர கிலோமீட்டர். இங்கு புலி, சிறுத்தை, கரடி, காட்டுப்பன்றி, பலவகையான மான், நரி, ஓநாய், காட்டு நாய், மலபார் அணில், பச்சைப் புறா, காடை, கவுதாரி மற்றும் முதலை போன்றவைகள் நிறைய இருக்கின்றன.

நகர்ஹோலே[தொகு]

கர்நாடகாவில் மைசூரில் இருந்து 90 கிலோமீட்டர் தொலைவில் இருக்கும் வனவிலங்குகளுக்கான இந்த குடகுமலைத் தேசீயப் பூங்காவின் மொத்தப் பரப்பளவு 571 சதுர கிலோமீட்டர். இங்கு யானை, புலி, சிறுத்தை, கரடி, காட்டுப்பன்றி, காடை, கவுதாரி மற்றும் காட்டுக்கோழி போன்றவைகள் நிறைய இருக்கின்றன.

பன்னார்கட்டா[தொகு]

கர்நாடகாவில் பெங்களூரில் இருந்து 20 கிலோமீட்டர் தொலைவில் இருக்கும் இந்த வனப்பகுதியின் பன்னார்கட்டா தேசியப்பூங்காவில் பலவகையான மான்கள் இருக்கின்றன.

ரங்கன் திட்டு[தொகு]

கர்நாடகாவில் ஸ்ரீரங்கப்பட்டினம் ஊருக்கு வடக்கே 10 கிலோமீட்டர் தொலைவில் இருக்கிறது ரங்கன் திட்டு சரணாலயம். இங்கு ஆண்டுதோறும் சூலை மாதம் முதல் ஆகஸ்ட் மாதம் வரையுள்ள காலத்தில் திறந்த வாய் நாரை, கரண்டி மூக்கன் மற்றும் வெள்ளை இபிஸ் போன்ற நீர்நிலைப் பறவைகள் சில வந்து செல்கின்றன.

கேரளா[தொகு]

கேரளாவில் இருக்கும் முக்கியமான சரணாலயம் பெரியாறு சரணாலயம்தான்.

பெரியாறு[தொகு]

கேரளாவில் இருக்கும் கோட்டயம் எனும் ஊரிலிருந்து 114 கிலோமீட்டர் தொலைவிலும் தமிழ்நாட்டில் இருக்கும் தேனி எனும் ஊரிலிருந்து 66 கிலோமீட்டர் தொலைவிலும் இருக்கும் பெரியாறு சரணாலயத்தின் மொத்தப்பரப்பளவு 777 சதுர கிலோமீட்டர் ஆகும். இங்கு யானை, சிறுத்தை, கரடி, காட்டு எருமை, பலவகையான மான், காட்டு நாய், புலி, பலவகைக் குரங்கு, பறக்கும் அணில்கள், மலை அணில், காட்டுக் கோழி, காட்டு மைனா போன்றவைகள் நிறைய இருக்கின்றன.

அஸ்ஸாம்[தொகு]

அஸ்ஸாம் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்

காசிரங்கா[தொகு]

அஸ்ஸாம் மாநிலத்தில் கவுகாத்தியிலிருந்து 217 கிலோமீட்டர் தொலைவிலும், ஜோர்கட் எனும் ஊரிலிருந்து 84 கிலோமீட்டர் தொலைவிலும் இருக்கும் காசிரங்கா சரணாலயத்தின் மொத்தப்பரப்பளவு 430 சதுர கிலோமீட்டர். இது காண்டாமிருகத்திற்கான சிறப்பு சரணாலயமாகும். இங்கு காண்டாமிருகம், யானை, சதுப்பு நில மான், சிறுத்தை, பூனை, மலைப்பாம்பு, சிவப்புக் காட்டுக் கோழி, வாத்து, மானிட்டர் பல்லி போன்றவை அதிகமாக இருக்கின்றன.

மானஸ்[தொகு]

அஸ்ஸாம் மாநிலத்தில் கவுகாத்தியிலிருந்து 167 கிலோமீட்டர் தொலைவில் பூட்டான் நாட்டு எல்லையை ஒட்டியுள்ள வனப்பகுதியில் மானஸ் நதியுள்ள 360 சதுர கிலோமீட்டர் பரப்பளவைக் கொண்ட சரணாலயம் இது. இந்த சரணாலயத்தில் புலி, பலவகையான பறவைகள் பல இருக்கின்றன.

மேற்கு வங்காளம்[தொகு]

மேற்கு வங்காளம் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்

ஜல்டபாரா[தொகு]

மேற்கு வங்காளம் மாநிலத்தில் ஜல்பைகுரி மாவட்டத்தில் ஹாசிமாரா அருகில் அமைந்துள்ள இந்த சரணாலயத்தின் மொத்தப்பரப்பளவு 116 சதுர கிலோமீட்டர். இங்கு யானை, புலி, சிறுத்தை, காட்டுப் பன்றி, காட்டு எருமை, குரைக்கும் மான், முள்ளம்பன்றி மற்றும் பலவகையான பறவை போன்றவை அதிகமாக இருக்கின்றன.

சுந்தரவனம்[தொகு]

மேற்கு வங்காளம் மாநிலத்தில் கல்கத்தாவிற்குத் தெற்கே 112 கிலோமீட்டர் தொலைவிலும் போட்கானிங் எனும் ஊரிலிருந்து 48 கிலோமீட்டர் தொலைவிலும் சுந்தரவனம் இருக்கிறது. இந்த சுந்தரவனத்தின் வடக்குப் பகுதியை சஜ்ரகலி சரணாலயம் என்றும் தெற்குப் பகுதியை லோதெய்ன் தீவு சரணாலயம் என்றும் சொல்கின்றனர். இதன் மொத்தப் பரப்பளவு 2585 சதுர கிலோமீட்டர். இங்கு ராயல் பெங்கால் டைகர்ஸ் எனும் சிறப்பு புலி, மான், காட்டுப்பன்றி, பலவிதமான முதலை மற்றும் ஆமை இருக்கின்றன.

பீகார்[தொகு]

பீகார் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

ஹஜாரிபாக்[தொகு]

பீகார் மாநிலத்தில் ராஞ்சி எனும் ஊரிலிருந்து 115 கிலோமீட்டர் தொலைவிலும் கோடர்மா எனும் ஊரிலிருந்து 50 கிலோமீட்டர் தொலைவிலும் உள்ள இந்த மலைப்பிரதேச சரணாலயத்தின் மொத்தப் பரப்பளவு 186 சதுர கிலோமீட்டர். இங்கு புலி, சிறுத்தை, காட்டுப்பன்றி, காட்டுப்பூனை, மயில், நீலப்பசு போன்றவை நிறைய இருக்கின்றன.

பலாமாவு[தொகு]

பீகார் மாநிலத்தில் ராஞ்சி எனும் ஊரிலிருந்து 180 கிலோமீட்டர் தொலைவிலும் சிப்பாதோஹர் எனும் ஊரிலிருந்து 80 கிலோமீட்டர் தொலைவிலும் உள்ள இந்த சரணாலயத்தின் மொத்தப் பரப்பளவு 979 சதுர கிலோமீட்டர். இங்கு புலி, யானை, சிறுத்தை, காட்டுப்பன்றி, காட்டுஎருமை, குரைக்கும் மான் மற்றும் பலவகையான மான் போன்றவை அதிகமாக இருக்கின்றன.

மகாராஷ்டிரா[தொகு]

மகாராஷ்டிரா மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

ராதாநகரி[தொகு]

மகாராஷ்டிரா மாநிலத்தில் இருக்கும் கோல்ஹாபூர் அருகில் இருக்கும் ராதாநகரி சரணாலாயத்தின் மொத்தப்பரப்பளவு 2072 சதுர கிலோமீட்டர். இது காட்டு எருமைகளுக்கான சரணாலயமாகும். இங்கு காட்டு எருமை, சிறுத்தை, காட்டுப் பன்றி, பல வகை மான்கள் அதிகம் இருக்கின்றன.

பொரிவ்லி[தொகு]

மகாராஷ்டிரா மாநிலத்தில் இருக்கும் மும்பை அருகில் 34 கிலோமீட்டர் தொலைவில் இருக்கும் பொரிவ்லி ஊரில் உள்ள விலங்கியல் தேசீயப் பூங்காவான இதன் மொத்தப் பரப்பளவு 100 சதுர கிலோமீட்டர். இங்கு சிறுத்தை, காட்டுப் பன்றி மற்றும் பறவைகள் இருக்கின்றன.

டடோபா[தொகு]

மகாராஷ்டிரா மாநிலத்தில் இருக்கும் சந்திராபூர் எனும் ஊரில் இருந்து 45 கிலோமீட்டர் தொலைவில் தெற்கிலும் வரோரா எனும் ஊரில் இருந்து 56 கிலோமீட்டர் தென்மேற்கிலும் இருக்கும் இந்த சரணாலயத்தின் மொத்தப் பரப்பளவு 117 சதுர கிலோமீட்டர். இங்கு புலி, சிறுத்தை, கரடி, காட்டு எருமை, கடம்பை மான், காட்டு மாடு, காட்டுப் பன்றி, முதலை ஆகியவை இங்கு இருக்கின்றன.

குஜராத்[தொகு]

குஜராத் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

கிர்[தொகு]

குஜராத் மாநிலத்தில் இருக்கும் சௌராஷ்டிரப் பகுதியில் கிர் தேசியப் பூங்கா எனும் சிங்கங்களுக்கான சரணாலயம் உள்ளது. இந்த சரணாலயம் சிங்கத்திற்கான ஆசிய அளவில் சிறப்பு பெற்ற சரணாலயமாகும். சாசன்கிர் எனும் ஊரிலிருந்து 42 கிலோமீட்டர் தொலைவில் இருக்கும் இந்த சரணாலயத்தின் மொத்தப் பரப்பளவு 1412 சதுர கிலோமீட்டர். இங்கு சிங்கம், சிறுத்தை, காட்டுப் பன்றி, கடம்பை மான், மலைப்பாம்பு, கழுகு மற்றும் கருடன் போன்றவைகள் நிறைய இருக்கின்றன.

பிரோடன்[தொகு]

குஜராத் மாநிலத்தில் இருக்கும் ஜாம்நகர் எனும் ஊரில் இருந்து 6 கிலோமீட்டர் தொலைவில் இருக்கும் இந்த கடல் சரணாலயத்தின் மொத்தப் பரப்பளவு 271 சதுர கிலோமீட்டர். இங்கு பருவகாலமாக நவம்பர் மாதம் துவங்கி பிப்ரவரி மாதம் வரை இருக்கிறது. இங்கு ஆக்டோபஸ், பவளப் பூச்சி, பப்பர் மீன், கொக்கு, நாரை போன்றவை இருக்கிறது.

சுரேந்திர நகர்[தொகு]

குஜராத் மாநிலத்தில் இருக்கும் தாரங்கத்ரா எனும் ஊரில் இருந்து 25 கிலோமீட்டர் தொலைவில் இருக்கும் சுரேந்திர நகர் சரணாலயத்தின் மொத்தப் பரப்பளவு 3569 சதுர கிலோமீட்டர். இது காட்டுக்கழுதைகளுக்கான சரணாலயம் ஆகும். இந்தக் காட்டுக் கழுதைகள் அரேபியா, துருக்கி, திபெத், மங்கோலியா, ரசியா போன்ற நாடுகளில் மட்டும்தான் இருக்கின்றன. இங்கு காட்டுக் கழுதை தவிர காட்டு மாடு, ஓநாய், கடம்பை மான் போன்றவைகளும் இருக்கின்றன.

பவநகர் மாவட்டம்[தொகு]

வெளிமான்களும் கழுதைப்புலிகளும் அதிகம் கொண்ட வெளிமான் தேசியப் பூங்கா, வெலாவதார் பவநகர் மாவட்டத்தில் அமைந்துள்ளது.

மத்தியப் பிரதேசம்[தொகு]

மத்தியப் பிரதேசம் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

கன்ஹா[தொகு]

மத்தியப் பிரதேசம் மாநிலத்தில் இருக்கும் சிரிடோங்கிரி எனும் ஊரில் இருந்து 110 கிலோமீட்டர் தொலைவில் உள்ள இந்த சரணாலயம் மண்ட்லா மற்றும் பாலாகாட் எனும் இரண்டு மாவட்டங்களில் மொத்தப் பரப்பளவில் 1940 சதுர கிலோமீட்டர் உள்ளது.இங்கு புலி, மான், காட்டுப் பன்றி, காட்டு எருமை, சிறுத்தை, குரைக்கும் மான், சுண்டெலி மான், முள்ளம்பன்றி, காட்டு மாடு போன்றவைகள் நிறைய இருக்கின்றன.

பந்தவ்கர்[தொகு]

மத்தியப் பிரதேசம் மாநிலத்தில் இருக்கும் உமாரியா எனும் ஊரில் இருந்து 30 கிலோமீட்டர் தொலைவில் இருக்கும் இந்த சரணாலயத்தின் மொத்தப் பரப்பளவு 105 சதுர கிலோமீட்டர். இங்கு புலி, வெள்ளைப் புலி போன்றவை இருக்கின்றன.

சிவ்புரி[தொகு]

மத்தியப் பிரதேசம் மாநிலத்தில் இருக்கும் ஜான்சி எனும் ஊரில் இருந்து 94 கிலோமீட்டர் தொலைவில் இருக்கும் சிவ்புரி சரணாலயத்தில் கடம்பை மான் மற்றும் காட்டு மாடு போன்றவை அதிகமாக இருக்கின்றன.

ராஜஸ்தான்[தொகு]

ராஜஸ்தான் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

ரண்தம்போர்[தொகு]

ராஜஸ்தான் மாநிலத்தில் இருக்கும் சவாய் மதாபூர் எனும் ஊரில் இருந்து 11 கிலோமீட்டர் தொலைவில் உள்ள இந்த சரணாலயத்தின் மொத்தப் பரப்பளவு 392 சதுர கிலோமீட்டர் உள்ளது. இங்கு புலி, சிறுத்தை, காட்டுப் பன்றி, கழுதைப்புலி, ஓநாய், காட்டுப் பூனை, புனுகுப்பூனை, காடை, கவுதாரி, பச்சைப்புறா, சிவப்புக் காட்டுக் கோழி போன்றவைகள் நிறைய இருக்கின்றன.

பரத்பூர்[தொகு]

ராஜஸ்தான் மாநிலத்தில் இருக்கும் ஆலிவர் எனும் ஊரில் தெற்கில் இருக்கும் இந்த சரணாலயத்தின் மொத்தப் பரப்பளவு 29 சதுர கிலோமீட்டர். இங்கு 350 க்கும் அதிகமான பறவை வகைகள் இருக்கின்றன.

சாரிஸ்கா[தொகு]

ராஜஸ்தான் மாநிலத்தில் இருக்கும் ஆலிவர் எனும் ஊரில் இருந்து 21 கிலோமீட்டர் தொலைவில் இருக்கும் சாரிஸ்கா சரணாலயத்திலன் மொத்தப் பரப்பளவு 197 சதுர கிலோமீட்டர். இங்கு புலி, சிறுத்தை மற்றும் பலவகையான மான்கள் , முதலை போன்றவை அதிகமாக இருக்கின்றன.

ஜெய்சல்மேர் பார்மர்[தொகு]

ராஜஸ்தான் மாநிலத்தில் இருக்கும் ஜெய்சல்மேர் நகரைச் சுற்றி அமைந்துள்ள இந்தப் பாலைவனச் சரணாலயத்தின் மொத்தப் பரப்பளவு 3000 சதுர கிலோமீட்டர் ஆகும். இந்தப் பாலைவனப் பகுதியில் அதிகமாக வளர்ந்துள்ள புதர்ச்செடிப் பகுதிகளில் சில வகை மான்கள், ஓநாய், பாலைவன பூனை, நரி போன்றவைகளுடன் பஸ்டர்டு எனும் அரியவகைப் பறவையும் இங்கு காணப்படுகின்றன.

உத்திரப் பிரதேசம்[தொகு]

உத்திரப் பிரதேசம் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

கார்பெட்[தொகு]

உத்திரப் பிரதேசம் மாநிலத்தில் இருக்கும் ராம் நகர் எனும் ஊரில் இருந்து 50 கிலோமீட்டர் தொலைவில் உள்ள இந்த சரணாலயம்தான் இந்தியாவில் அமைக்கப்பட்ட முதல் சரணாலயம். இந்த சரணாலயத்தின் மொத்தப் பரப்பளவு 525 சதுர கிலோமீட்டர் ஆகும். இங்கு புலி, குரைக்கும் மான், புள்ளி மான், கடம்பை மான், காட்டுப் பன்றி, முள்ளம்பன்றி, சிறுத்தை, முள் எலி, மலைப்பாம்பு, கரடி, காடை, கவுதாரி காட்டு மாடு போன்றவைகள் நிறைய இருக்கின்றன.

இங்கு 110 வகையான மரங்கள், 51 வகையான புதர்ச்செடிகள், 33 வகையான மூங்கில்கள் இருக்கின்றன.

தூத்வா[தொகு]

உத்திரப் பிரதேசம் மாநிலத்தில் இருக்கும் தூத்வா எனும் ஊரில் இருக்கும் இந்த சரணாலயம் நேபாள நாட்டு எல்லையை ஒட்டி அமைந்துள்ளது. இதன் மொத்தப் பரப்பளவு 492 சதுர கிலோமீட்டர். இங்கு புலி, சிறுத்தை, கரடி, நீலப்பசு, மீன் பூனை, சிறுத்தைப் பூனை, கொம்பு ஆந்தை, கழுகு ஆந்தை, காடை, கவுதாரி, கொக்கு மற்றும் நாரை போன்றவைகள் இருக்கின்றன.

நந்ததேவி[தொகு]

உத்திரப் பிரதேசம் மாநிலத்தில் இமயமலைப் பனிப் பிரதேசப் பகுதியில் இருக்கும் இந்த சரணாலயத்தில் மொத்தப் பரப்பளவு 630 சதுர கிலோமீட்டர். இங்கு ஹிமாலயப் பிரௌன் கரடி, ஹிமாலய கறுப்புக் கரடி, பனிச் சிறுத்தை, கஸ்தூரி மான் மற்றும் பனிப்புழு போன்றவை அதிகமாக இருக்கின்றன.

ஒரிசா[தொகு]

ஒரிசா மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

சிம்லிபால்[தொகு]

ஒரிசா மாநிலத்தில் இருக்கும் பாரிபாடா எனும் ஊரில் இருந்து 50 கிலோமீட்டர் தொலைவில் உள்ள இந்த சரணாலயத்தின் மொத்தப் பரப்பளவு 303 சதுர கிலோமீட்டர் ஆகும். இங்கு சுண்டெலி மான், புலி, சிறுத்தை, யானை, காட்டு எருமை, பறக்கும் அணில் ஆகியவை அதிகம் இருக்கின்றன.

சில்கா[தொகு]

ஒரிசா மாநிலத்தில் இருக்கும் பால்கான் எனும் ஊரில் இருக்கும் இந்தப் பறவைகள் சரணாலயத்தின் மொத்தப் பரப்பளவு 900 சதுர கிலோமீட்டர். இங்குள்ள ஏரியில் பலவகையான கொக்கு, நாரை, போன்ற நீர்நிலைப் பறவைகள் மற்றும் மான்கள் போன்றவைகள் இருக்கின்றன.

சட்கோஜியா கார்ஜ்[தொகு]

ஒரிசா மாநிலத்தில் தென்கனால், பூரி, கட்டாக் மற்றும் பூல்பனி எனும் நான்கு மாவட்டங்களில் இருக்கும் இந்த சரணாலயத்தின் மொத்தப் பரப்பளவு 730 சதுர கிலோமீட்டர். இங்கு புலி, யானை, சிறுத்தை, காட்டு எருமை, காட்டுப் பன்றி, குரங்கு மற்றும் காடை, கவுதாரி, பறக்கும் அணில் போன்றவை அதிகமாக இருக்கின்றன.


இமாசலப் பிரதேசம்[தொகு]

இமாசலப் பிரதேசம் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

மணலி[தொகு]

இமாசலப் பிரதேசம் மாநிலத்தில் இருக்கும் குலூ எனும் ஊரில் இருந்து 45 கிலோமீட்டர் தொலைவில் உள்ள இந்த மணலி சரணாலயத்தின் மொத்தப் பரப்பளவு 29 சதுர கிலோமீட்டர் ஆகும். இங்கு செப்டம்பர், அக்டோபர் மற்றும் மே, ஜீன் ஆகிய மாதங்கள் பருவகாலமாக இருக்கிறது. இங்கு தார், சேரோ, கோரல், கலிஜ், கோக்லாஸ், சக்கோர் மார்டன் எனும் இமாசலப் பிரதேசத்தில் மட்டும் இருக்கும் அபூர்வ விலங்குகள், புனுகுப் பூனை, பறக்கும் நரி ஆகியவை இருக்கின்றன.

ஜம்மு காஷ்மீர்[தொகு]

ஜம்மு காஷ்மீர் மாநிலத்தில் இருக்கும் முக்கியமான சில சரணாலயங்கள் மற்றும் தேசீயப் பூங்காக்கள்.

டச்சிகாம்[தொகு]

ஜம்மு காஷ்மீர் மாநிலத் தலைநகர் ஸ்ரீநகர் எனும் ஊரில் இருந்து 26 கிலோமீட்டர் தொலைவில் உள்ள இந்த சரணாலயத்தின் மொத்தப் பரப்பளவு 142 சதுர கிலோமீட்டர் ஆகும். இங்கு ஏப்ரல் மாதம் துவங்கி நவம்பர் மாதம் வரையிலான எட்டு மாதங்கள் பருவகாலமாக இருக்கிறது. இங்கு மான், ஹிமாலயக் கரடி, பனிச்சிறுத்தை, காட்டு ஆடு, பனிப்பிரதேச மயில், இபெக்ஸ், கஸ்தூரி மான் ஆகியவை இருக்கின்றன.

இதனையும் காண்க[தொகு]

மேற்கோள்கள்[தொகு]

  1. sanctuary
  2. List of wildlife-sanctuaries in India
  3. "List of bird sanctuaries in india". Archived from the original on 2018-02-19. பார்க்கப்பட்ட நாள் 2016-06-07.
"https://ta.wikipedia.org/w/index.php?title=இந்தியச்_சரணாலயங்கள்&oldid=3824470" இலிருந்து மீள்விக்கப்பட்டது