அலெக்சாண்டர் ஃபொன் ஹும்போல்ட்

அலெக்சாண்டர் ஃபொன் ஹும்போல்ட்
அலெக்சாண்டர் ஃபொன் ஹும்போல்ட், ஜோசப் ஸ்டீலரால் வரையப்பட்டது, 1843
பிறப்பு	செப்டெம்பர் 14, 1769
பிறப்பிடம்	பேர்லின்
இறப்பு	மே 6, 1859
தேசியம்	ஜேர்மானியர்
துறை	இயற்கையியலாளர்
அறியப்படுவது	வரலாறு

வில்ஹேம் ஹைனரிஷ் அலெக்சாண்டர் ஃபிரீகர் ஃபொன் ஹும்போல்ட் (Friedrich Wilhelm Heinrich Alexander Freiherr von Humboldt - செப்டெம்பர் 14, 1769 – மே 6, 1859) ஒரு இயற்கையியலாளரும், நாடுகாண் பயணியும் ஆவார். இவர் பிரசிய அமைச்சரும், மெய்யியலாளரும், மொழியியலாளருமான வில்ஹெம் ஃபொன் ஹும்போல்ட் (1767-1835) என்பாரின் உடன்பிறந்தார். அலெக்சாண்டர் ஹும்போல்டின் தாவரவியல் புவியியல் தொடர்பிலான கணியம்சார் பணிகள் தாவரவியல் புவியியல் துறையின் அடிப்படையாக அமைந்தவை.

1799 க்கும் 1804 க்கும் இடையில் ஹும்போல்ட் இலத்தீன் அமெரிக்காவுக்குப் பயணம் செய்து அக்கண்டத்தை முதன் முறையாக அறிவியல் நோக்கில் ஆராய்ந்து விளக்கினார். இவரது பயணத்தின் விளக்கங்கள் 21 ஆண்டுகளாகப் பல பகுதிகளாக எழுதப்பட்டு வெளியிடப்பட்டது. அத்திலாந்திக் பெருங்கடலைச் சூழவுள்ள நிலப்பகுதிகள், குறிப்பாக ஆபிரிக்காவும், தென்னமெரிக்காவும், ஒருகாலத்தில் ஒன்றாக இணைந்திருந்தன என முதன் முதலில் கூறியவர்களில் இவரும் ஒருவர். பின்னர், ஐந்து பகுதிகளாக வெளியிடப்பட்ட இவரது நூலான கொஸ்மோஸ் (1845) பல்வேறு அறிவியல் துறைகளின் அறிவை ஒன்றிணைக்க முயல்கிறது. ஹும்போல்ட் பிற அறிவியலாளர்களான அய்மே போன்பிளாண்ட், ஜோசெப்-லூயி கே-லுசாக், ஜஸ்டஸ் ஃபொன் லீபிக், லூயி அகாசிஸ், மத்தியூ ஃபொன்டைன் மௌரி போன்றோரை ஆதரித்ததுடன், அவர்களுடன் சேர்ந்தும் பணியாற்றினார்.