அண்ணா பல்கலைக்கழகம்

அண்ணா பல்கலைக்கழகம்
குறிக்கோள் வாசகம்	Progress Through Knowledge (அறிவு வழி முன்னேற்றம்)
தொடக்கம்	1978
பள்ளி வகை	சேர் பல்கலைக்கழகம்
துணை-வேந்தர்	முனைவர். மன்னர் ஜவஹர்
அமைவிடம்	சென்னை, தமிழ் நாடு, இந்தியா
வளாகம்	100 ஏக்கர்கள் (400,000 m²)
இணைய முகவரி	http://www.annauniv.edu/

அண்ணா பல்கலைக்கழகம் இந்தியாவின் தலைசிறந்த பல்கலைக்கழகங்களில் ஒன்றாகும். 1978ல் நிறுவப்பட்ட இப்பல்கலைக்கழகம், பொறியியல், தொழில்நுட்பம் மற்றும் தொடர்புடைய அறிவியல் துறைகளில் உயர் கல்வி பட்டப்படிப்புகள் வழங்குவதுடன் ஆராய்ச்சிப் பணிகளையும் மேற்கொற்கிறது.

வரலாறு

செப்டம்பர் 4, 1978-இல், சென்னையின் பழம்பெரும் தொழில்நுட்பக் கல்வி நிறுவனங்களான கிண்டி பொறியியல் கல்லூரி, அழகப்பர் தொழில்நுட்பக் கல்லூரி, மெட்ராசு தொழில்நுட்ப கழகம் ஆகியவற்றை ஒருங்கிணைத்து ஒற்றைப் பல்கலைக்கழகமாக அண்ணா பல்கலைக்கழகம் உருவாக்கப்பட்டது. டிசம்பர் 2001 முதல், ஏறக்குறைய தமிழ்நாட்டில் உள்ள அனைத்துப் பொறியியல் கல்லூரிகளும் அண்ணா பல்கலைக்கழகத்தின் கீழ் இணைக்கப்பட்ட பின் சேர் பல்கலைக்கழகமாக, அண்ணா பல்கலைக்கழகம் செயல்பட்டு வருகிறது. நிர்வாக வசதிகளுக்காக ஜனவரி 2007 முதல் அண்ணா பல்கலைக்கழகம்,

• அண்ணா பல்கலைக்கழகம், சென்னை
• அண்ணா பல்கலைக்கழகம், கோவை
• அண்ணா பல்கலைக்கழகம், திருச்சி
• அண்ணா பல்கலைக்கழகம், மதுரை
• அண்ணா பல்கலைக்கழகம், திருநெல்வேலி என ஐந்து பிரிவுகளாக பிரிக்கப்பட்டது.

பின்னர் 2011-ம் ஆண்டு, அனைத்து அண்ணா பல்கலைக்கழகமும் ஒருங்கிணைக்க சட்டசபையில் தீர்மானம் நிறைவேற்றப்பட்டது.

வளாகம்

பல்கலைக்கழகத்தின் முதன்மை வளாகம், தென் சென்னை பகுதியில் 100 ஏக்கர் (400,000 m²) பரப்பில் அமைந்துள்ளது. அடையாறும் தமிழக ஆளுனர் மாளிகையான ராஜ் பவனும் இவ்வளாகத்தை ஒட்டி அமைந்துள்ளன. முதன்மை வளாகத்தில் கிண்டி பொறியியல் கல்லூரி, அழகப்பர் தொழில்நுட்பக் கல்லூரி, கட்டிடக்கலை மற்றும் திட்டமிடுதல் பள்ளி அமைந்துள்ளன. மெட்ராசு தொழில்நுட்ப கழகம் 200,000 m² பரப்பளவில் குரோம்பேட்டை வளாகத்தில் அமைந்துள்ளது. அழகப்பர் தொழில்நுட்பக் கல்லூரியின் சில ஆய்வுக்கூடங்கள் தரமணி வளாகத்தில் அமைந்துள்ளன.

உள்ளடக்கிய பல்கலைக்கழக வளாகங்கள்

அண்ணா பல்கலைக்கழக வளாகம்

• கிண்டி பொறியியல் கல்லூரி வளாகம்
• அழகப்பர் தொழில்நுட்பக் கல்லூரி வளாகம்
• மெட்ராசு தொழில்நுட்ப கழகம் வளாகம்
• கட்டிடக்கலை மற்றும் திட்டமிடுதல் பள்ளி வளாகம்

இணைந்துள்ள கல்லூரிகள்

அண்ணா பல்கலைக்கழகச் சீரமைப்பு விதி (The Anna University Amendment Act) 2001-இன் படி, ஏறக்குறைய தமிழ்நாட்டில் உள்ள அனைத்துப் பொறியியல் கல்லூரிகளும் அண்ணா பல்கலைக்கழகத்தின் கீழ் இணைக்கப்பட்டன. இவற்றுள் ஆறு அரசு பொறியியல் கல்லூரிகளும் மூன்று அரசு உதவி பெறும் தனியார் பொறியியல் கல்லூரிகளும் 225 தனியார் சுய நிதிப் பொறியியல் கல்லூரிகளும் அடங்கும்.

குறிப்பிடத்தக்க முன்னாள் மாணவர்கள்

• ஏ. பி. ஜே. அப்துல் கலாம், முன்னாள் இந்தியக் குடியரசுத் தலைவர்
• கிரேசி மோகன், பிரபல தமிழ் நகைச்சுவை நாடக ஆசிரியர், நடிகர்.
• 'சுஜாதா' ரங்கராஜன் , பிரபல தமிழ் எழுத்தாளர்
• முனைவர் ராஜ் ரெட்டி, 1994ம் ஆண்டிற்கான டியூரிங் பரிசு வென்றவர், கார்னெகி மெல்லன் பல்கலைக்கழகத்திலுள்ள கணிப்பொறியியல் துறையின் முன்னாள் முதல்வர்.
• கிருஷ்ணமாச்சாரி ஸ்ரீகாந்த், முன்னாள் இந்திய கிரிக்கெட் ஆட்டக்காரர்

பிற தகவல்கள்

• இப்பல்கலைக்கழகம், 1978 முதல் 1982 வரை, "பேரறிஞர் அண்ணா தொழில்நுட்பப் பல்கலைக்கழகம்" என்று அழைக்கப்பட்டது. அதன் பின் தற்போதைய பெயருக்கு மாறியது.
• அண்மையில், தேசிய அங்கீகாரக் குழு (National Accreditation Committee) அண்ணா பல்கலைக்கழகத்திற்கு 5 நட்சத்திர அங்கீகாரம் வழங்கியுள்ளது.

வெளி இணைப்புகள்

• அதிகாரப்பூர்வ இணையத்தளம்
• அண்ணா பல்கலைக்கழகத்தின் கீழ் இணைக்கப்பட்டுள்ள கல்லூரிகளின் பட்டியல்